Cerkak bahasa jawa -kodhok lan bekicot

           Cerkak "kodhok lan Bekicot"         

Judul buku : Panyebar semangat

Judul cerkak : Kodhok lan Bekicot
Penganggit : Impian Nopitasari
Pangecap : Majalah panyebar semangat
Tanggal pangecapan : 21 septembaer,  2013

Kodhok lan Bekicot

          Bekicot karo kodhok mono kanca raket sing sedina-dina tansah bebarengan ing endi wae. Senajan cara mlakune beda, sing siji cepet, sing siji nggremet, nanging kekarone wis kaya sedulur sinarawedi. Senajan ngono, kadhangkala bekicot ngrasa Gusti ora adil, dheweke tansah iren karo kanca rakete yaiku si kodhok, kena apa kok kodhok bisa sak kepenake dhewe mencolot mrana-mrene dene dheweke mlaku wae angele pol, isih kudu nggawa omah sisan. Wis pokoke rekasa dadi bekicot, ngono batine. 

          Pirang-pirang ndina iki sesambungan antarane Kodhok lan Kicot katon renggang. Kicot wegah sapa aruh marang Kodhok senajan Kodhok wis nyoba nyedhaki.

          Lagi sedhela nggremet dumadakan ana swara kang nggegirisi. Kicot ndhangak, saiba kagete ora adoh saka panggone ana manuk elang kang lagi golek mangsa. Age-age dhewekke ndelikke awake ing njero omah. Nadyan ngono elang kasil nyengkerem dheweke, nanging kersane Gusti cengkereman kuwi mrosot lan Kicot tiba ing sapinggiring kali, banjur glundhung ing njero banyu, kalis saka bebaya. Manuk elang kasebut ora nututi dheweke, sajake pilih golek mangsa liyane. Kicot ayem dheweke ora sida dadi mangsane si elang. Nanging saiba kagete nalika dheweke weruh elang kasebut oleh mangsa kang banget ditepungi mbendinane. Ora liya si Kodhok. Kahanane nrenyuhke, karana kulit lan daginge sing empuk, gampang wae kanggone elang kang nduwe cakar sing landhep nujes anggane si Kodhok. Ing kahanan antarane urip lan mati. Kicot rumangsa getun.